Украина менен Орусия ортосундагы сүйлөшүүлөрдүн жаңы айлампасы ушул жумада Стамбулда өтүшү мүмкүн. Бул тууралуу Independent Türkçe басылмасы дипломатиялык булактарга таянып жазды. Маалыматка караганда, делегациялардын техникалык жолугушуусу 23 же 24-июлда болушу мүмкүн. Тараптар “согуш туткундарын айырбаштоо, жарандык инфраструктуранын жана чек ара аймагындагы коопсуздук” өңдүү чектелген маселелерди талкуулайт деп күтүлүүдө.
19-июлда украин президенти Владимир Зеленский Улуттук коопсуздук жана коргоо кеңешинин катчысы Рустем Умеров орус делегациясына сүйлөшүүлөрдүн жаңы айлампасын өткөрүү сунушун жолдогонун билдирген. Зеленскийдин айтымында, “сүйлөшүүлөрдүн динамикасын жогорулатуу жана ок атышууну токтотуу үчүн колдо бар чара көрүү зарыл”.
Киев менен Москва май жана июнь айында Стамбулда өткөн сүйлөшүүлөрдө согуш туткундарынын бир нече тобун алмашууну, башка гуманитардык маселелерди макулдашкан. Бирок ок атышууну токтотуу келишими жетишилген эмес. Украин президенти бул үчүн лидерлер жолугушушу керек деп айтып келатат.
Орусия ээлеп алган аймактардан украин аскерлеринин чыгып кетишин талап кылууда. Украина бул талапты четке кагып жатат.
Independent Türkçe басылмасы үстүбүздөгү аптада Стамбулда Иран менен европалык үч өлкөнүн өкүлдөрү Тегерандын өзөктүк программасын талкуулашарын да белгилейт.
Украина Орусияга келерки апта сүйлөшүүнүн жаңы айлампасын өткөрүүнү сунуштады. Бул тууралуу 19-июлда Украинанын президенти Владимир Зеленский согуш башталганына 1242 күн болгонуна байланыштуу жасаган кайрылуусунда айтты. Анын айтымында, бул сунушту орус тарапка сүйлөшүү боюнча украин делегациясынын башчысы Рустем Умеров жеткирген. Ушул аптада ал Улуттук коопсуздук жана коргоо кеңешинин катчысы болуп дайындалып, коргоо министри кызматынан кеткен.
Зеленский Умеров Орусияга качан жана кайсыл жерде жолугушууну сунуштаганын ачыктаган жок. Жолугушуунун буга чейинки эки айлампасы Стамбулда өткөн. Соңку жолугушуу июнь айынын башында болду. Буга чейин орусиялык өкүлдөр Украина тараптан жолугушуунун жаңы айлампасына даяр экендиги боюнча белги ала электигин айтышкан.
Зеленскийдин айтымында, “сүйлөшүүлөрдүн динамикасын жогорулатып”, “ок атышууну токтотууга жетишүү үчүн бардыгын жасоо керек”.
Киев менен Москва июнь айында Стамбулда өткөн сүйлөшүүлөрдө согуш туткундарынын бир нече тобун алмашууну макулдашкан.
Орусия Украинанын жолугушуу тууралуу сунушуна комментарий бере элек.
14-июлда президент Трамп Орусия 50 күндүн ичинде Украинадагы урушту токтотуу үчүн макулдашууга көнбөсө Москва жана анын соода өнөктөштөрү "өтө катаал" бажы тарифтерине кабыларын эскерткен.
20-июлга караган түнү Москванын түндүк-батышындагы Зеленоград району украиналык дрондордун чабуулуна туш болду. Маалыматтарга караганда, атып түшүрүлгөн учкучсуз учактардын сыныктары тийген эки машина күйүп кетти. Көп кабаттуу үй зыян тартты. Жараат калгандар тууралуу маалымат берилген жок.
Шаардын мэри Сергей Собяниндин айтымында, абадан коргонуу күчтөрү Москваны көздөй учкан 16 дронду атып түшүрдү. Дагы беш учкучсуз учак 19-июлда атып түшүрүлгөн. Калаа мэри 20-июлда эртең менен дагы дрондор атып түшүрүлгөнүн кабарлады.
Москвадагы “Шереметьево”, “Внуково”, “Домодедово” жана “Жуков” аэропортторуна ишемби кечинде жана жекшембиге караган түнү учактардын конуусуна жана учуусуна чектөө киргизилди. Аэропорттор бир нече саатка жабылып, таңга маал чектөөлөр алынды.
"Аэрофлот", “Победа” авиакомпаниялары чектөөлөргө байланыштуу каттамдарды жылдырууга туура келгенин жазды. Орусиянын авиациясы жалпысынан акыркы суткада кошумча аэродромго 134 учак кеткенин билдирди.
Орусиянын Коргоо министрлиги 20-июлга караган түнү абадан коргонуу күчтөрү ар кайсыл аймакта украиналык 93 дронду атып же колго түшүргөнүн кабарлады.
Украина соңку чабуулдар туурасында комментарий бере элек.
Бир күн мурун пилотсуз учактын чабуулунан Ростов облусундагы темир жолдогу байланыш түйүнү бузулганы кабарланган. Натыйжада ишемби күнү кечинде 75тен ашык жүргүнчү поезди кармалып калган.
Азербайжандын президенти Илхам Алиев Украинаны Орусия ээлеп алган аймактарынан баш тартпоого чакырды. Бул тууралуу ал Шуша шаарындагы медиафорумда украиналык журналист Дмитрий Гордондун суроосуна жооп берип жатып айтты. Алиев 30 жылдан бери Тоолуу Карабак жана ага жакын аймактардын бир бөлүгүн Баку көзөмөлдөбөй калган Азербайжан менен Украинадагы кырдаалды салыштырды.
Кавказдагы эки өлкө Тоолуу Карабак маселесинен улам 30 жылдан ашуун жаңжалдашып келди. Азербайжан 2023-жылы сентябрда аймакты өз карамагына толук алгандан кийин ортодогу атышуу дээрлик токтогон. Ал жакта жашаган армян улутундагы 100 миңдей киши үй-жайын таштап чыгып кетүүгө мажбур болгон.
"Сүйлөшүүлөр жүргөн жылдарда... Мен ага 2003-жылдын аягынан тарта катышып келем. 17 жылдан бери көптөгөн сунуштар болду, көптөгөн жолугушуулар болду. Реалдуу жагдайды карап тил табышуу зарылчылыгы тууралуу көп билдирүүлөр болду. Андан кийин жаңы реалдуулуктарды биз жаратабыз, силер ага макул болосуңар деп чечтик. Мына ушундай болду", - деп белгиледи Алиев.
Азербайжан Украинанын аймактык бүтүндүгүн колдой турганын ачык билдирип келатат.
Буга чейин Баку орус тышкы иштер министри Сергей Лавровдун Карабакты талаштуу аймак деп атаганына нааразы болгон.
Шушада сүйлөп жатып Алиев Азербайжан былтыр кышында Азербайжан аба жолдору (AZAL) компаниясынын учагы кырсыкка учураган жагдай боюнча эл аралык сотко кайрылуу үчүн документтерди даярдап жатканын билдирди.
Компаниянын учагы былтыр 25-декабрда кырсыкка учураганда Азербайжандын бийлиги лайнер Грозныйга отурар маалда орусиялык ракетадан коргонуу системасынын актылоосуна кабылганын айтууда. Жүргүнчү учак Казакстандын Актау шаарына бет алууга аргасыз болуп, ошол жакта кулаган.
Борттогу 67 адамдын 38и каза болуп, калганы аман калган.